مرے کانوں میں مصری گھولتا ہے
کوئی بچہ جب اُردو بولتا ہے
(مشتاق دربھنگوی)
کسی بھی زبان کی ترقی میں اس زبان میں تخلیق کیا گیا ادب ایک بنیادی کردار ادا کرتا ہے اور ادب چاہے کسی بھی صنف میں ہو وہ نہ صرف یہ کہ اہل زبان کے علم وہنر میں جدت پیدا کرتا ہے بلکہ دیگر اقوام کو بھی اہل زبان سے متعارف کروانے کا سبب بنتا ہے، یہی وجہ ہے کہ آج کے جدید دور میں اُردو زبان کی اہمیت اور افادیت کو اُجاگر کرنے میں بیکن ہاوٴس اسکول سسٹم ہفتہ اُردو ادب کو ہر سال ماہِ نومبر میں منعقد کرتا ہے جوکہ ہماری نئی نسل کی تعلیمی قابلیت کو بڑھانے میں موٴثر اقدام ثابت ہوتا ہے۔بیکن ہاؤس نارتھ ناظم آباد پرائمری -۱ میں ہفتہ اُردو ادب جوش و خروش سے منایا گیا، جس میں مختلف سرگرمیوں ( نظم گوئی، شکوہ جوابِ شکوہ، تقریری مقابلہ اور ذہنی آزمائش ) کے ذریعہ طلباء کی تخلیقی اور لسانی صلاحیتوں کو فروغ ملا اور سامعین طلباء سے بھی داد وصول کی ۔نظم گوئی میں طلباء نے الفاظ کے اُتار چڑھا ؤ ، درست تلفظ کی ادائیگی اور خود اعتمادی کے ساتھ اپنی صلاحیتوں کا اظہار کیا۔ جماعت پنجم کے طلباء نے زبان پر عبور ، ڈرامائی انداز اور پیشکش کی مہارت کو مدِ نظر رکھتے ہوئے بہترین انداز میں ٹیبلو کے ساتھ شکوہ جوابِ شکوہ پیش کیا۔ جماعت ششم کے طلباء نے تقریری مقابلہ میں جوش و خروش کے ساتھ حصہ لیا اور مختلف مراحل سے گزرتے ہوئے فائنل تک پہنچے۔ جماعت ہفتم کے طلباء نے اُردو کے نامور شعراء اور ادیبوں کے بارے میں یاد کر کے ذہنی آزمائش کے مقابلے میں حصہ لیا اور اپنی معلومات کا لوہا منوایا۔
